Plattdüütscher Familiendag in Lübeck
Lübeck: Archiv - 06.09.2022, 11.12 Uhr: Sleswig-Holsteenschen Heimatbund un ADS Grenzfriedensbund e.V. laadt an´n Sünndag, 25. Septembermaand, plattdüütsche Grootöllern, Öllern un Kinner to´n Familiendag na Lübeck. Op´t Programm steiht en plattdüütsche Föhren dörch dat europääsche Hansemuseum un en Haventörn op Kanaal un Traav mit Reederee Quandt.„Eenmal in´t Johr maakt wi so en Familiendag. Wi wüllt wat beleven un dor op henwiesen, wo goot Kinner dat deit, wenn se mit Platt opwasst“, vertellt Britta Poggensee vun´n ADS Grenzfriedensbund. De Hansestadt Lübeck as Utfloogsmaal harrn se sik mit Bedacht utkeken, sett Jan Graf vun´n Heimatbund dorto: „Plattdüütsch weer in de Hansetiet en wichtige europääsche Spraak un warrt ok vundaag in vele Sleswig-Holsteensche Familien snackt.“
Klock 12 geiht de Plattdüütsche Familiendag los un duert dree Stünnen. Mitmaken kost nix, un de Lütten köönt sik op en Överraschen freuen. Wokeen Fragen hett oder dorbi ween will, de schall sik tiedig mellen ünner j.graf@heimatbund.de, Tel. 0431/98384-15. Plätz sünd aftellt.
Tietplaan:
Kl. 11.45 – Drapen vör den Hööftingang vun´t Hansemuseum, An der Untertrave 1, 23552 Lübeck
Kl. 12.00 – Plattdüütsche Föhren dörch dat Hansemuseum
Kl. 13.00 – Meddagspaus. Wokeen will, de blifft sitten in´t Foyer vun´t Hansemuseum mit Utkiek op de Traav. De Museumsshop verköfft beten wat, man een kann ok mitbröcht Eten un Drinken vertehren.
Kl. 13.45 – Drapen an den Anlegger an de MUK-Brüch op de anner Siet vun de Traav. (Vun´t Hansemuseum na de MUK-Brüch 12 Minuten to Foot.)
Kl. 14.00 - Havenrundfohrt mit Reederee Quandt. An Bord kann een Kaffe, Limo etc. bestellen.
Kl. 15.00 – Tschüß
Am 25. September kann Lübeck auf plattdeutsch erkundet werden. Foto: Quandt Linie/Archiv
Text-Nummer: 153721 Autor: Veranstalter vom 06.09.2022 um 11.12 Uhr